די ערשטע ביראָבידזשאַנער אינטערנאַציאָנאַלע זומער-פּראָגראַם פֿון ייִדיש

צענטער פֿאַר אויספֿאָרשן די געשיכטע און קולטור פֿון ייִדיש

ווײַט-מיזרחדיקע מלוכה-אַקאַדעמיע פֿאַר הומאַניטאַרע און סאָציאַלע לימודים

30-13 אויגוסט 2007

כ"ט אָבֿ - ט"ז אלול תּשס"ז

ביראָבידזשאַן

ייִדישע אויטאָנאָמע געגנט

רוסלאַנד

צום ערשטן מאָל אין דער געשיכטע פֿון ייִדיש-לימודים ווערט דערעפֿנט אַן אינטערנאַציאָנאַלע זומער-פּראָגראַם פֿון ייִדיש אין ביראָבידזשאַן, די הויפּטשטאָט פֿון דער ייִדישער אויטאָנאָמער געגנט. זינט 1934 איז ביראָבידזשאַן דאָס איינציקע אָרט אין דער וועלט וווּ ייִדיש האָט אַן אָפֿיציעלן סטאַטוס פֿון אַ מלוכה-שפּראַך. אין משך פֿון די יאָרן האָט ביראָבידזשאַן איבערגעלעבט אַ סך פּאָליטישע טראַגעדיעס און עקאָנאָמישע שוועריקייטן, וועלכע האָבן רויִנירט חלומות און טרוימען פֿון אַ סך ייִדישיסטן. קיינער אָבער האָט ניט אָפּגעשאפֿן אָפֿיציעל דעם סטאַטוס פֿון ייִדיש אין דער אויטאָנאָמיע.

דאָס יאָר ווערט אָרגאַניזירט לעבן דעם פֿאַקולטעט פֿאַר פֿרעמדע שפּראַכן בײַ דער ווײַט-מיזרחדיקער מלוכה-אַקאַדעמיע פֿאַר הומאַניטאַרע און סאָציאַלע לימודים אין ביראָבידזשאַן דער צענטער פֿאַר אויספֿאָרשן די געשיכטע און קולטור פֿון ייִדיש. די ערשטע אונטערנעמונג פֿונעם צענטער וועט זײַן אָט די דרײַ-וואָכיקע זומער-פּראָגראַם, מיטן אָנטייל פֿון פֿירנדיקע ייִדיש-לעקטאָרן פֿון פֿאַרשיידענע אוניווערסיטעטן אויף דער וועלט און ייִדישע קולטור-טוער. די פּראָגראַם איז געווענדט סײַ פֿאַר אוניווערסיטעט-סטודענטן, סײַ פֿאַר אַלע פאַראינטערעסירטע.

די פּראָגראַם וועט באַשטיין פֿון 90 אַקאַדעמישע שעה (4 קרעדיטן). עס ווערן פֿאָרגעלייגט 4 שפּראַכניוואָען, לעקציעס וועגן ייִדישער ליטעראַטור און קולטור, ווי אויך מאַסטערקלאַסן פֿון חזנים-רעפּערטואַר (מיט אַ חזן פֿון מאָנטרעאָל) און פֿון קינעמאַטאָגראַף אויף ייִדיש. די לימודים וועלן פֿאָרקומען אַלע טאָג, אַחוץ שבת, פֿון 9:30 אין דער פֿרי ביז 13:00 נאָך מיטאָג, און פֿון 17:00 ביז 18:30 אין אָוונט.

• אָנטיילנעמען אין די עטנאָגראַפֿישע עקספּעדיציִעס איבער די רחבֿותן פֿון דער ייִדישער געגנט און באַזוכן די איבערגעבליבענע איבערוואַנדערער-ייִשובֿים מיט ייִדישע נעמען – ביראָפֿעלד, וואַלדהיים, נײַפֿעלד, אַמורזעט;
• זיך טרעפֿן מיט די ערשטע איבערוואַנדערער;
• זיך טרעפֿן מיט די פֿאָרשטייערס פֿון דער אויטאָנאָמיע-רעגירונג; 
• באַזוכן די אָרטיקע ייִדישע אינסטיטוציעס – די צײַטונג "ביראָבידזשאַנער שטערן", די ראַדיאָ- און טעלעוויזיע-סטודיִעס, שולן, קהילה-אַנשטאַלטן, מוזייען, די שלום-עליכם ביבליִאָטעק;
• זיך באַטייליקן אין אַן עקסקורסיע איבער די ייִדישע ערטער פֿון דער הויפּט-שטאָט פֿון דער אויטאָנאָמיע;
• באַזוכן די שכנישע שטאָט כאַבאַראָווסק, דער צענטער פונעם רוסישן ווײַטן מיזרח; 
• צוצופֿאָרן אין דער כינעזישער שטאָט כאַרבין און זיך באַקענען מיט דאָרטיקע ייִדישע מאָנומענטן, אָדער אין דעם רוסישן שטילאָקעאַנישן פּאָרט וולאַדיוואָסטאָק (אָפּציאָנעל); 
• פּראַווען שבת-טיש מיט דער ביראָבידזשאַנער ייִדישער קהילה.